अकरावीच्या विद्यार्थ्याची आत्महत्या, संतप्त नातेवाइकांचा शिक्षकाच्या घरावर हल्ला
वाळवा तालुक्यात अकरावीमध्ये शिकणाऱ्या १७ वर्षीय विराज डकरेने राहत्या घरी गळफास लावून आत्महत्या केल्याची घटना घडली. अत्यंत हुशार आणि ८९ टक्के गुण मिळवणाऱ्या विराजच्या आत्महत्येनंतर परिसरात खळबळ उडाली आहे. नातेवाइकांनी शिक्षकावर संशय व्यक्त करत इस्लामपूर रस्त्यावरील शिक्षकाच्या घरावर हल्ला चढवला. खिडक्या आणि दुचाकी फोडण्यात आल्या. पोलिसांनी तात्काळ बंदोबस्त तैनात करत परिस्थिती नियंत्रणात आणली. या घटनेने शैक्षणिक वर्तुळात चिंता निर्माण केली असून, विराजच्या आत्महत्येचे खरे कारण अद्याप समोर आलेले नाही.
विराजच्या आत्महत्येनंतर गावात तणाव, शिक्षकावर संताप
विराज डकरेच्या आत्महत्येची बातमी समजताच शाळेतील विद्यार्थ्यांमध्ये शोककळा पसरली. गावात एका शिक्षकाकडून वर्गात अपमान झाल्याची चर्चा जोर धरताच नातेवाइकांनी थेट शिक्षकाच्या घरावर हल्ला केला. बराच वेळ तोडफोड सुरू होती. सायंकाळी विराजचा मृतदेह घरी आणल्यावर परिसरात मोठी गर्दी झाली. हळहळ व्यक्त करणाऱ्यांची रीघ लागली होती. विराजच्या पश्चात आई, वडील आणि भाऊ असा परिवार असून, त्यांच्या डोळ्यांतून अश्रू थांबत नव्हते. घटनास्थळी पोलिसांचा बंदोबस्त तैनात करण्यात आला आहे.